వివాదాస్పద వ్యాఖ్యలు; రోజాకు నోటీసులు

అమరావతి: వైయస్సార్ కాంగ్రెస్ పార్టీ నగరి ఎమ్మెల్యే రోజా మరోసారి చిక్కుల్లో పడ్డారు. ఆమెకు మరోసారి ప్రివిలేజ్ నోటీసులు జారీ చేయనున్నారు.

రాష్ట్రపతి ఎన్నికల పోలింగ్ సందర్భంగా ఓటు వేసేందుకు వచ్చిన రోజా రాజకీయ వ్యాఖ్యలు చేశారు. ఎమ్మెల్యేలతో కలిసి ముఖ్యమంత్రి మాక్ పోలింగ్ నిర్వహించారని, స్పీకర్ చైర్‌లో ఉన్న కోడెల కూడా దానికి సహకరించారని ఆరోపించారు.

స్పీకర్ దిగజారి ప్రవర్తించారని రోజా విమర్శించారు. ముఖ్యమంత్రి మాక్ ఓటింగ్ నిర్వహించడం సరికాదన్నారు. రోజా వ్యాఖ్యలను అసెంబ్లీ వర్గాలు స్పీకర్ దృష్టికి తీసుకు వెళ్లాయి. దీనిపై ఆయన సీరియస్‌గా స్పందించారు.

నిబంధనలకు విరుద్ధంగా రోజా అసెంబ్లీ ప్రాంగణంలో రాజకీయ వ్యాఖ్యలు చేయడం పట్ల స్పందించిన స్పీకర్ కోడెల శివప్రసాద రావు.. రోజాకు నోటీసులు ఇవ్వాలని అసెంబ్లీ కార్యదర్శిని ఆదేశించారు.

దీంతో మరోసారి రోజా చిక్కుల్లో పడ్డారు. గతంలో శాసన సభలో వివాదాస్పద వ్యాఖ్యలు చేసినందుకు కూడా ఆమెకు ప్రివిలేజ్ కమిటీ నోటీసులు ఇచ్చింది. ఇప్పుడు మరోసారి నోటీసులు ఇవ్వనుంది.

తాను స్పీకర్ స్థానానికి మచ్చ తెచ్చేలా ఎప్పుడూ ప్రవర్తించలేదని కోడెల అన్నారు. తన ప్రవర్తన స్పీకర్ పదవికి వన్నె తెచ్చేలా ఉందన్నారు. రాష్ట్రంలో జరిగే పలు అభివృద్ధి కార్యక్రమాలకు తాను హాజరవుతుంటానని, వైసిపి నేతలు కూడా తన వద్దకు వచ్చి పనులు చేయించుకుంటారన్నారు.

తనకు అన్ని పార్టీలు సమానమేనని స్పీకర్ కోడెల చెప్పారు. ఒకరిని ఎక్కువగా, ఒకరిని తక్కువగా తాను చూడనని చెప్పారు. ఓటింగ్ సందర్భంగా తాను టిడిఎల్పీ కార్యాలయానికి వెళ్లలేదని, ముఖ్యమంత్రికి, తనకు ఓటు ఎలా వేయాలో తన కార్యాలయం ఎదుటే అధికారులు సూచనలు చేశారన్నారు. కాగా, మాక్ పోలింగ్‌ను కోడెల పరిశీలించారే కానీ, ఆయన పాల్గొనలేదని టిడిపి నేతలు చెబుతున్నారు.

Comments 0

Write a comment ...

Note: Press Ctrl+g to change langaue between Telugu<=>English

Post comment
Cancel
There is no replies to this Topic, Please submit your comments.
Back to Top