స్వైన్‌ ఫ్లూ లక్షణాలు.. తీసుకోవాల్సిన జాగ్రత్తలు

స్వైన్‌ ఫ్లూ భూతం మళ్లీ కోరలు చాస్తోంది. ఈ మహమ్మారి బారిన పడి సోమవారం (ఆగస్టు 28) ఏకంగా ఓ ఎమ్మెల్యేనే మరణించిన విషయం తెలిసిందే. బాలీవుడ్ హీరో ఆమిర్ ఖాన్ దంపతులు కూడా ఇటీవల స్వైన్ ఫ్లూ బారిన పడి కోలుకున్నారు. కేంద్ర ఆరోగ్య శాఖ గణాంకాల ప్రకారం.. ఈ ఏడాది ఇప్పటివరకూ దేశంలో మొత్తం 1094 మంది స్వైన్ ఫ్లూ కారణంగా మృత్యువాతపడ్డారు. ఒక్క ఆగస్టు నెలలోనే 342 మంది మరణించారు. మహారాష్ట్రలో 437 మంది, గోవాలో 269 మంది, రాజస్థాన్‌లో 69 మంది మరణించారు.

తెలుగు రాష్ట్రాల్లోనూ ఈ మహమ్మారి బారిన పడి నలుగురైదుగురు మృత్యువాతపడ్డారు. ప్రజలు ఈ వ్యాధి పట్ల అప్రమత్తంగా ఉండాలని ఇప్పటికే పలు రాష్ట్ర ప్రభుత్వాలు హెచ్చరికలు కూడా జారీ చేశాయి. ఈ నేపథ్యంలో.. స్వైన్ ఫ్లూ వ్యాధి లక్షణాలు, తీసుకోవాల్సిన జాగ్రత్తల గురించి తెలుసుకుందాం..

స్వైన్‌ ఫ్లూ వ్యాధి హెచ్‌1 ఎన్‌1 అనే వైరస్‌ మూలంగా వస్తుంది. స్వైన్‌ ఫ్లూలోనూ సాధారణ ఫ్లూ జ్వరం లక్షణాలే కనిపిస్తాయి.

స్వైన్ ఫ్లూ లక్షణాలు:

* జ్వరం, తలనొప్పి, గొంతునొప్పి.. స్వైన్ ఫ్లూ వ్యాధి ప్రధాన లక్షణాలు

* ముక్కు దిబ్బడ, ముక్కు కారటం కూడా ఉంటాయి.

* జ్వరానికి తోడు దగ్గు, ఒళ్లు నొప్పులు, తీవ్రమైన నీరసం ఉంటాయి.

* కొంత మందికి వాంతులు, విరేచనాలు కూడా కావొచ్చు.

* మొదట ఇది మామూలు జ్వరం మాదిరిగానే ప్రారంభమవుతుంది. ఆ తర్వాత లక్షణాలు తీవ్రమవుతాయి.

* లక్షణాలు తీవ్రంగా ఉన్నా.. తగు చికిత్స తీసుకోకపోతే న్యుమోనియా తీవ్రమయ్యే ప్రమాదం ఉంటుంది. స్వైన్‌ ఫ్లూ మరణాలకు చాలా వరకూ ఇదే కారణం.

స్వైన్‌ ఫ్లూ.. గాలి ద్వారా ఒకరి నుంచి మరొకరికి వ్యాపిస్తుంది. స్వైన్‌ ఫ్లూ రోగులు దగ్గినా, తుమ్మినా వైరస్‌ గాలిలో కలుస్తుంది. ఆ గాలిని పీలిస్తే ఇతరులకూ సోకుతుంది. దగ్గినప్పుడు, తుమ్మినపుడు వెలువడే తుంపర్లు పడిన చోట కూడా వైరస్‌ అంటుకొని ఉంటుంది. పొరపాటున దాన్ని ముట్టుకున్న చేతితో నోరు, ముక్కు, కళ్లను రుద్దుకుంటే.. ఇక అంతే సంగతులు.

హెచ్‌1 ఎన్‌1 వైరస్‌ రక్తంలో ఉండదు. శ్వాసకోశ అవయవాల్లో ఉంటుంది. అందువల్ల డాక్టర్లు.. ముక్కు లేదా నోటి నుంచి దూదిపుల్లతో స్రావాలను తీసి పరీక్షిస్తారు. స్వైన్‌ ఫ్లూ పరీక్షను ప్రత్యేక ప్రయోగశాలల్లో మాత్రమే నిర్వహిస్తారు.

తీసుకోవాల్సిన జాగ్రత్తలు:

* మనలో చాలా మంది ఫ్లూ చలికాలంలోనే వస్తుందని అనుకుంటారు. కానీ, ఫ్లూ జ్వరాలు ఏ కాలంలోనైనా రావొచ్చు. చలికాలంలో తక్కువ ఉష్ణోగ్రతల కారణంగా ఫ్లూ కారక వైరస్‌ గాలిలో ఎక్కువ కాలం బతికి ఉండటం వల్ల ఎక్కువగా వ్యాపించే ప్రమాదం ఉంటుంది.

* స్వైన్‌ ఫ్లూ విజృంభిస్తున్న సమయంలో.. పనుల నిమిత్తం బయటకు వెళ్లేవాళ్లు తప్పనిసరిగా తగిన జాగ్రత్తలు తీసుకోవాలి. నోటికి అడ్డంగా రుమాలు చుట్టుకోవటం మేలు.

* జ్వరంతో పాటు తలనొప్పి, గొంతు నొప్పి, దగ్గు, ఒంటి నొప్పులు, తీవ్రమైన నీరసం ఉంటే.. వెంటనే డాక్టర్‌ను సంప్రదించి తగిన వైద్య పరీక్షలు చేయించుకోవాలి.

* మామూలు ఫ్లూ లక్షణాలు కనిపిస్తే పెద్దగా ఆందోళన చెందాల్సిన పనిలేదు. ఇంట్లోనే ఉండి జాగ్రత్తలు తీసుకుంటే సరిపోతుంది. కానీ లక్షణాలు ముదురుతుంటే మాత్రం నిర్లక్ష్యం చేయొద్దు.

* కుటుంబ సభ్యులు, బంధువులెవరైనా స్వైన్ ఫ్లూ బారిన పడితే మిగిలినవాళ్లు అప్రమత్తంగా ఉండాలి. రోగికి చికిత్స అందిస్తూనే సొంత రక్షణ చర్యలు తీసుకోవాలి.

* అన్నింటికంటే ముఖ్యంగా.. మనలో రోగ నిరోధక శక్తి బలంగా ఉంటే ఎలాంటి వ్యాధి సోకే ప్రమాదాలైనా తక్కువగా ఉంటాయి. కాబట్టి రోగ నిరోధకశక్తి పెంచుకోవడానికి నిత్యం ప్రయత్నం చేయాలి.

* సమతుల ఆహారం తీసుకోవడం, వేళకు భోంచేయడం, తగినంత నిద్ర ఉండేలా చూసుకోవాలి. దీనికి తోడు వ్యాయామం తప్పనిసరి. జ్యూస్, పండ్లు ఎక్కువగా తీసుకుంటే.. రోగ నిరోధకశక్తి బాగా వృద్ధి చెందుతుంది. అప్పుడు వైరస్‌ ఒంట్లోకి ప్రవేశించినా.. మన శరీరం దాన్ని సమర్థంగా ఎదుర్కోగలుగుతుంది.

* స్వైన్‌ ఫ్లూ బాధితులు ముక్కుకు, నోటికి రుమాలు లాంటివి అడ్డం పెట్టుకోవటం మరిచిపోవద్దు. తద్వారా ఈ జబ్బును ఇతరులకు వ్యాపించకుండా చాలా వరకూ నివారించినవారవుతారు.

రక్షణ టీకాతో ఎలాంటి ఫ్లూ దరిచేరదు..

స్వైన్‌ ఫ్లూ రాకుండా కాపాడుకోవడానికి ఓ టీకా కూడా అందుబాటులోకి వచ్చింది. ఇది స్వైన్‌ ఫ్లూతో పాటు ఇతరత్రా ఫ్లూ వైరస్‌ల బారి నుంచి కూడా కాపాడుతుంది. ఫ్లూ విజృంభణకు ముందే.. సాధారణ ఆరోగ్యంతో ఉన్నప్పుడే దీన్ని తీసుకుంటే ఇక తిరుగే ఉండదు. ఆరేళ్ల లోపు పిల్లలు, 80 ఏళ్లు పైబడిన వృద్ధులు, రోగ నిరోధకశక్తి తక్కువగా ఉన్నవారు, వైద్య సిబ్బంది తప్పనిసరిగా ఈ టీకా తీసుకోవడం ఉత్తమం.

గర్భిణులు మాత్రం మొదటి 3 నెలల్లో ఈ టీకా తీసుకోకూడదు. 4-6 నెలల మధ్యలో తీసుకోవచ్చు. దీంతో పుట్టబోయే పిల్లలకు కూడా ఫ్లూ రాకుండా రక్షణ ఉంటుంది. మరి ఈ జాగ్రత్తలు తీసుకొని మీ ఆరోగ్యాన్ని పదిలపరుచుకుంటారు కదూ..

Comments 0

Write a comment ...

Note: Press Ctrl+g to change langaue between Telugu<=>English

Post comment
Cancel
There is no replies to this Topic, Please submit your comments.
Back to Top