డెంగ్యూ లక్షణాలు.. తీసుకోవాల్సిన జాగ్రత్తలు

అంటువ్యాధుల్లో అత్యంత ప్రమాదకరమైనది డెంగ్యూ. ఇది దోమల ద్వారా వ్యాప్తి చెందే భయంకరమైన వ్యాధి. ఎడిస్‌ ఈజిప్టై దోమ కుట్టడం వల్ల ఈ వైరస్ ప్రబలుతోంది. ఈ దోమను టైగర్ దోమ అని కూడా అంటారు. ఈ దోమలు పగటిపూటే కుడుతాయి. ఈ దోమ కుట్టిన ఐదు నుంచి ఎనిమిది రోజుల తరువాత వ్యాధి లక్షణాలు కనిపిస్తుంటాయి. అలాగే డెంగ్యూ వ్యాధి వచ్చిన రోగిని కుట్టిన దోమ.. మరొకరిని కుట్టినా ఈ వైరస్‌ వ్యాప్తి చెందుతుంది. ప్రస్తుతం వర్షాలు పడుతుండటం వల్ల దోమల బెడద ఎక్కువగా ఉంటుంది. ఈ కాలంలోనే డెంగ్యూ వేగంగా వ్యాప్తి చెందుతుంది. కాబట్టి ఈ వ్యాధి లక్షణాలు ఎలా ఉంటాయో ప్రతి ఒక్కరు తెలుసుకోవడం మంచిది.

వ్యాధి లక్షణాలు..

తీవ్రమైన తలనొప్పి: డెంగ్యూ లక్షణాల్లో ప్రధానమైనది తలనొప్పి. డెగ్యూ సోకిన వారికి విపరీతంగా తలనొప్పి వస్తుంది. తల భారంగా మారుతుంది.

జ్వరం: డెంగ్యూ సోకిన వారికి జ్వరం వస్తూ పోతూ ఉంటుంది. ఒక్కసారిగా జ్వర తీవ్రత 104 డిగ్రీల ఫారన్‌హీట్ వరకు పెరుగుతుంది. ఇలా తరచూ జరుగుతుంటే వెంటనే డాక్టరును సంప్రదించాలి. ఎందుకంటే ఆ జ్వరం డెంగ్యూకి దారితీయొచ్చు.

కీళ్ల నొప్పులు: డెంగ్యూ వ్యాధి సోకితే కీళ్ల నొప్పులు, కండరాల నొప్పులు ఎక్కువగా ఉంటాయి.

రక్తస్రావం: డెంగ్యూ లక్షణాల్లో ఇది ప్రధానమైనది. డెంగ్యూ ఉంటే ముక్కు (శ్లేష్మ పొర) నుంచి రక్తస్రావం జరుగుతుంది. వ్యాధి తీవ్రస్థాయికి చేరుకున్నప్పుడు ఈ రక్తస్రావం అధికంగా ఉంటుంది. అలాంటి సందర్భాల్లో చనిపోయే అవకాశం ఉంది.

వాంతులు-వికారం: డెంగ్యూ సోకితో నోరు ఎండిపోతుంది. మాటిమాటికీ దాహం వేస్తుంది. అలాగే కడుపులో కాస్త నొప్పిగా, వికారంగా ఉండటం.. వాంతి అవుతున్నట్లు అనిపిస్తూ ఉంటుంది.

ఒక వేళ పై లక్షణాలు గనుక ఎవరికైనా ఉంటే వెంటనే వైద్యుడిని సంప్రదించడం మేలు. వ్యాధి ఉందో.. లేదో నిర్ధారణ చేసుకోవాలి. ఎందుకంటే డెంగ్యూ ప్లేట్లెట్ల సంఖ్య బాగా తగ్గిపోతుంది. అలా జరిగితే ప్రాణానికే ప్రమాదం.

జాగ్రత్తలు..

⦿ డెంగ్యూను నివారించడానికి ఎలాంటి టీకాలు లేవు. కాబట్టి దోమ కాటుకు గురి కాకుండా ఉండటమే మార్గం. ఇంటి సమీపంలో నీరు నిల్వ ఉండకుండా చూసుకోవాలి. నీటి ట్యాంకుకు మూత వేయాలి. నీటి నిల్వ ఉంచుకునే కుండీలను కనీసం వారానికి ఒకసారి శుభ్రం చేసి ఆరనివ్వాలి.

⦿ ఇంట్లో దోమలు తిరుగుతున్నట్లు అనిపిస్తే వెంటనే దోమ తెరలను అమర్చుకోవాలి. వాటిని తరిమికొట్టే కొన్ని నివారణ మందులు వాడాలి. శరీరంలోని అన్ని భాగాలకు రక్షణ కలిగే విధంగా దుస్తులు ధరించాలి. పిల్లలకు శరీర భాగాలు పూర్తిగా కప్పేటట్లు దుస్తులు వేయాలి.

⦿ ఈ డెంగ్యూ దోమలు పూల తొట్టెలు, నీటి ట్యాంకులు, టైర్లల్లో గుడ్లు పెడతాయి. ఇంకో విషయం ఏంటంటే ఈ దోమల గుడ్లు సంవత్సరం వరకు పొడి ప్రాంతాల్లో కూడా జీవించగలవు. కాబట్టి ఇంట్లో కుండీల్లో, ఉపయోగించని టైర్లు వంటి వాటిలో నీటి నిల్వ లేకుండా చూసుకోవాలి.

Comments 0

Write a comment ...

Note: Press Ctrl+g to change langaue between Telugu<=>English

Post comment
Cancel
There is no replies to this Topic, Please submit your comments.
Back to Top