డ్రగ్స్: మీడియా ముందుకు రవితేజ తల్లి

టాలీవుడ్ సినీ పరిశ్రమను కుదిపేస్తున్న డ్రగ్స్ కేసులో అగ్ర హీరో ఉన్నాడంటూ ప్రచారం జరుగుతోంది. అతడు మరెవరో కాదు మాస్ మహరాజ్ రవితేజ అనే అనుమానాలు సైతం వ్యక్తం అవుతున్నాయి. రవితేజ గురించి ఇలా ప్రచారం మొదలైన నేపథ్యంలో ఆయన తల్లి రాజ్యలక్ష్మి మీడియాముందుకొచ్చారు.

తన కొడుకు గురించి మీడియాలో తప్పుడు ప్రచారం జరుగుతుందని ఆమె ఆవేదన వ్యక్తం చేశారు. ఈ క్రమంలోనే ఇటీవల రోడ్డు ప్రమాదానికి గురై మరణించిన మరో కుమారుడు భరత్ ఇష్యూపై కూడా ఆమె మాట్లాడారు. పలు సందేహాలను నివృత్తి చేసే ప్రయత్నం చేశారు.

డ్రగ్స్‌ కేసులో రవితేజ పేరు రావడం బాధాకరమని ఆయన తల్లి రాజ్యలక్ష్మి అన్నారు. రవితేజకు కనీసం సిగరెట్‌ అలవాటు కూడా లేదని, అలాంటి వాడిని డ్రగ్స్‌ కేసులో ఇరికించేందుకు ప్రయత్నాలు జరుగుతున్నాయని ఆమె ఆవేదన వ్యక్తం చేశారు.

భరత్‌ మద్యం మత్తులో రోడ్డుప్రమాదంలో చనిపోయాడనేది అవాస్తవమని రాజ్యలక్ష్మి స్పష్టం చేశారు. భరత్‌ చనిపోయే కొద్దిరోజుల ముందే చెడు అలవాట్లను మానేశాడని, బిగ్‌ బాస్‌ షోకు కూడా ఎంపికయ్యాడని ఆమె తెలిపారు.

తమ కుటుంబ ఆచారం ప్రకారమే భరత్‌ అంత్యక్రియలకు తాను హాజరు కాలేదని, కానీ మీడియాలో తమపై మరో రకంగా ప్రచారం జరుగుతోందని ఆమె తెలిపారు.

ఒకప్పుడు భరత్ డ్రగ్స్ కేసులో ఉన్నాడని... రవితేజను కూడా అదే విధంగా చూడటం సరికాదని రాజ్యలక్ష్మి తెలిపారు. భరత్‌ను దారిలో పెట్టేందుకు తాను రేయింబవళ్లు కనిపెట్టుకుని ఉండేదాన్నని, తర్వాత భరత్ చాలా మారిపోయాడని తెలిపారు.

సోదరుడి మరణాన్ని చూసి రవితేజ తట్టుకోలేడని, అందుకే చివరి చూపుకు రాలేదని తెలిపారు. తమ్ముడి పోయిన దుఃఖంలో ఉన్నా నిర్మాతలు నష్టపోకూడదన్న కారణంతోనే రవితేజ షూటింగులకు హాజరయ్యాడని రాజ్యలక్ష్మి తెలిపారు.

Comments 0

Write a comment ...

Note: Press Ctrl+g to change langaue between Telugu<=>English

Post comment
Cancel
There is no replies to this Topic, Please submit your comments.
Back to Top